• ×
  • تسجيل

الأربعاء 29 مارس 2017 اخر تحديث : 03-18-2017

قائمة

فهد حمدان خلاف
بواسطة  فهد حمدان خلاف

شفتوني وانا في ال....

زيادة حجم الخط مسح إنقاص حجم الخط
شفتوني وانا في ال....
هذي قصة واقعية وحدثت معي شخصيا
القصة :
من حوالي 8 سنوات أو أكثر كنت بسيارتي عند الاشارة الساعة 8 صباحا بشارع التحلية وبالتحديد قدام شركة الكهرباء وكان يومها دوبهم فنوا الإشارة نظامين يعني أول شي تخضر للي يبغى يمشي على طول بس .. واللي يبغى يلف شمال ينتظر شوية على أساس تخفيف للزحمة . المهم اللي قدامي المفترض ينتظر لما تخضر اشارة اللفة شمال والأخ لا شعوريا وماهو مستوعب التغيير الجديد للإشارات وجاك داعم وكفشوا حق المرور وفي اللحظة دي فكت اشارة اللفة وأنا دعمت وراه طبيعي واللوح العسكري يحسبني قطعت الاشارة وأخذ مننا الرخص والاستمارات وعلى راسه ألف سيف إلا نتضيف عنده في التوقيف 24 ساعة وهو مشي قدامنا واحنا وراه وأنا طبعا وراهم زي اللوح . ودخلنا النوقيف وأول ما دخلنا طبعا كانت غرفة عادية يعني يجيلها 7×6 متر المشكلة فيها حوالي 16 نفر . وأنا أقول في نفسي دحين حيفكونا وندفع المخالفة 300 ريال ونخرج مع إني بريء واتوقعت كل واحد ياخذله كف أو كفين ويقولوا لينا لا عاد تعيدوها وكان الوقت تقريبا 9 صباحا وطبعا كل واحد يفتي بفتوة ويقول حيخرجونا ياشيخ بس هيا ساعة ساعتين واحنا برة وطبعا إحنا فرحانين بالكلام لأننا متعلقين بقشة على أمل إبليس في الجنة وكان فيه واحد بنقالي قطعلنا الأمل لمن قال : هذا في خروج بكرة الساعة 9 سبح وزعقنا عليه وقلناله : ياأخي قول خير مغصت بطوننا وإيش عرف أهلك انه الخروج بكرة وطبعا أكدلنا الكلام بجواب منطقي جدا وقال : أنا يزي هنا غرفة كتير ممكن ستتعس مرة . ومافي مرة واهد يروه برة لازم اربع عسرين ساعة ... يخرب بيت شيطان سلسفيل أهلك .. المهم اشتغلنا اتصالات عن طريق جوالين ﻷشخاص مسجونين معانا لا ياشيخ قصدي موقوفين معانا قال يعني السجن يختلف وبصراحة واجهت مواقف في هذا التوقيف رهيبة جدا ..

الموقف الأول :
طبعا الغرفة فيها 3حمامات الباب حقها غطا ستارة وسرا على الحمام وبصراحة ماتجيك نفس للعملية 220 وتسويها 110 يعني سفري وتأجل ال220 بعد 24 ساعة لأنه تخاف واحد يفك الستارة فجأة ويشوفك متنح وإيش يكون موقفك صراحة في الأمم المتحدة .

الموقف التاني :
جوالين كنا نستخدمها في الاتصال على أهالينا ومعارفنا وبصراحة أصحاب الجوالين اعطونا نتصل محل مانبغى ومهما طالت مدة الاتصال وكانت ديك الأيام الجوالات أبو رسوم 10000 ريال ومين ابن أبوه اللي عنده جوال وجوال فاتورة يعني داك اليوم أقل جوال كلف مكالمات 300 ريال وزيادة ولا قالوا ليش وكيف وكان تعاون جميل جدا الله يجزاهم بكل خير . والمشكلة غلقت البطارية ومافي شاحن وطبيعي وقفنا الاتصالات اجباريا.

الموقف التالت :
طبعا أنا كلمت زميلي في العمل وماقصر وحضر وقال خلاص كمان ساعة يطلبوك ويخرجوك أنا كلمت واحد لواء يسير ابن خالتي قلت : فرجت يارجل كان الكلام دا الساعة 2 ظهر وإلين الساعة 2 في الليل ولا طلبوني ولا نيلة وقلت ياولد ماتنفع عندهم الواسطة مع العلم إن زميلي يقول هذا اللواء ابن خالته وعشان كدة فرحت لكن بعدين عرفت إن اللواء هذا فعلا يقربله بس مش ابن خالته هوا يسير (ابن عم جد خال ابن أخت عم ولد أخت أبوه ) ماشاء الله واضح قوة القرابة .

الموقف الرابع :
طبعا بعد الهجولة هذي والتعب لابد إنك خلاص يطيح جسمك وتبغى تنام المهم البشر اتسدحت وأنا بصراحة نعسان جدا بس قلت خليهم على الأقل نصهم يناموا عشان بصراحة الواحد يبغى يطمن على الوضع العام خاصة ومعانا باكستانيين الواحد فيهم مترين في مترين المهم كان جنبي واحد يمني ونايم نص نومة يعني ساند ظهره على الجدر ومفلقح رجوله وبيستعد للنوم . وفجأة واحنا في عز السكون سمعنا صوت شخير انطلق فجأة خرررررررر خرررررررر وطبعا طير أم النوم خاصة وشخيره على نغمات متعددة خررررررررر خرخرخرخرخرخر شر شر شر شر شر ياساتر إيش الحظ دا؟ واللي كان منسدح جنبي اللي ظهره على الجدار طبعا اتنرفز واتضايق وكان من الإخوة اليمنيين وقال : دحين هذا ابن الحمار ما حيخلينا نتام ولا كيف؟ قلت له : يالله لازم نتحمل وطبعا الراجل تعبان وبعد ماشجعته على التحمل رقد مطمن مطبق المقولة مجبر أخاك لا بطل ومافي 5 دقايق وانطلقت شخاخير من جهة تانية وألاقيها من صاحبنا الرومانسي اللي كان متضايق من شخير صاحبنا . وبعدين نغمات جديدة في الشخير ماقد سمعتها قبل كدة . وعمنا فهد حمدان نايم أو منسدح بين حبايبنا الإتنين ومع الحظ أنا من عادتي لو نمت وجنبي واحد شق ورقة على طول أقوم من صوت الورقة يعني نومي خفيف مابالك وأنا نايم بين كمبروسرين شغالين بقوة .

الموقف الخامس :
نسيت أقلكم الموقف هذا حصل الساعة 10 يعني بعد ما دخلنا الغرفة بساعة تقريبا وكانت الناس منهمكة وكل واحد بيدور واسطة عشان يخرجوه واشتغلت واسطات كتيييرة بس مانفعت وشوية واحد باكستاني مروح لابس لبس الله لا يوريكم طلب الجوال وقال : أنا يكلم نفر أشان أنا في خروج بعد ساعة أنا في شغل مستعجل ياضحكنا ضحك وضحك وحشيناه حش وكان اسمه شهانجير ميراد وقلنا أمل إبليس في الجنة . المهم اتصل على واحد ومافي ساعة وحدة ويجي العسكري وفرحنا قلنا إفراج ياشباب المهم العسكري زهم وقال شهانجير ميراد وعلى طول شهانجير طبعا خرج وقلنا مع السلامة واحنا نقول ينعل فرامل سلسفيل فرامل جدك . وكان معانا باكستاني تاني صاحب شهانجير وسألناه على قصة الراجل قال: هذا سواق وايت موية وكان زمان في عز انقطاع الموية وصاحبنا داك أبو رتبة مقطوعة من بيته الموية وطبعا سأل عن شهانجير وكلم صاحبنا مدير التوقيف وصاحبنا كلم العسكري وطار شهانجير واتمنيت يومتها لو كنت سواق وايت لكن راحت علينا .

الموقف السادس :
بصراحة كانت 24 ساعة ممتعة شفت فيها محبة الناس والتعاون بينهم مثلا أصحاب الجوالين ما قصروا . وكان واحد سوري مندوب شركة أدوية موقوف معانا الرجل هذا واقف على باب الغرفة ويطلب وجبات غدا لكل واحد ماعنده فلوس يعني على حسابه وبعد الغدا طلبلنا شاي وحليب بالشاي وكمان لو انت اتغديت يقلك : أطلب لك وجبة تانية ياسلام على النفس الطيبة الله يوفق الرجل هذا فين ما كان ويومتها عندي 300 ريال هيا حق الغرامة بس مفيش غيرها والفلوس كانت فى السياره داك اليوم عشته سلحته على الجوال والغدا والشاى وكان تعاون جميل جدآ وكان واحد صحى من النوم وجا واحد اعطاله الوجبة حقه عطفآ عليه والرجل السورى جبله وجبه بديله وبصراحه من كثر ما استمتعت بهذى الحاجات الإنسانيه النبيله قلت فى نفسى يبغالى يوم أقطع إشاره عشان أرجع تانى للغرفه بس قلت ماحضمن ألاقى السورى أو أصحاب الجوالات وأخاف ألاقى نفسى صفيت مع الباكستانى المروح والبنقلاديشي الزبون الدائم عندهم ومع كل دة والله مازلت فاكر معظم الاحداث هذى وكأنها صارت قبل اسبوع والسورى الطيب فاكر حتى لون القميص السماوى أبو كم طويل اللى كان لابسه وأصحاب الجوالات مانسيتهم وطبعآ تانى يوم مسكنا سرى وكل واحد مجهز 300 ريال ونعطيها للعسكرى ونمشى بس نسيوا العساكر يعطونا يعنى حتى البنقاله والهنود ماتلطشوا وقلت الحمد لله . وتانى يوم روحت مشوار أوصل واحد رزيل من عيال الحارة وجينا عند إشارة مصفرة والأخ يقول : لى أدعس أقطع الإشارة نبغى نوصل قبل الآذان يعنى قبل لايقفلوا بديهي طبعآ وقفت عند الإشارة والأخ يقللي : إنت جبان وقعدت تضحك وقلت له : ترى المره الجايه فيها كفوف.
قلت له كفوف إيش ؟ قلت له : قصدى يحطوك على كفوف الراحه مشى حالك يا كابتن . وسلامتكم وسامحونا على الإطاله .
ملاحظه : بالنسبه للباكستانى جت أخبار إنه بعد مافرغ الوايت لسعادة اللواء أرسل له 3 عساكر كففوه مظبوط ورجعوة الغرفة تانى تانى يوم يعنى بعد ماخرجنا عشان يكمل ال24 ساعة تعجبنى يا سعادة اللواء

إرسال لصديق
بواسطة : هبة محمد
 0  0  102

التعليقات

التعليقات ( 0 )

التعليقات ( 0 )